Sikop sa kapulisan sa Tagum City Police Station (CPS) ang usa ka 36-anyos nga lalaki human giingong mipasakit sa iyang kaugalingong inahan atol sa panaglalis sa ilang pinuy-anan sa Purok Poinsettia, Brgy. Magugpo North, Tagum City, niadtong nakalabay nga adlaw.
Base sa report sa Tagum PNP, ang biktima giila nga si alyas Janeth, 56 anyos, samtang ang suspetsado mao ang iyang anak nga si alyas Janneco, 36 anyos.
Matud sa biktima, mga ala-1:30 sa hapon nagsugod ang ilang lalis sulod sa balay. Atol sa panagbangi, giingong gisabwagan siya sa suspek og tubig ug sa ulahi gikuha niini ang usa ka kahoy nga gigamit sa pagbunal sa duha niya ka bitiis, hinungdan sa iyang mga samad.
Bandang alas-2:04 sa hapon, gidala sa biktima ang suspetsado ngadto sa Tagum City Police Station diin girekord ang reklamo batok niini. Gipahibalo usab sa kapulisan ang suspek sa hinungdan sa iyang pagdakop ug sa iyang mga katungod sumala sa balaod sa pinulongang iyang nasabtan.
Human niini, gipaubos siya sa medical examination ug karon gipabilin sa custodial facility sa Tagum PNP samtang giandam ang mga dokumento alang sa pagsaka sa angay nga kaso. Sa pagkakaron, nagpadayon ang imbestigasyon sa maong insidente.
Photo Courtesy: istock
