Mas gipakusgan pa karon ang digital learning alang sa mga estudyante sa lalawigan sa Surigao del Sur pinaagi sa pag-abli sa tulo ka bag-ong gi-renovate ug gi-upgrade nga computer laboratories sa lungsod sa Cantilan.
Si Department of Education (DepEd) Secretary Sonny Angara mismo ang nanguna sa inagurasyon sa mga bag-ong pasilidad nga nahimutang sa Cantilan Pilot Elementary School, Cantilan East Elementary School, ug St. Michael College.
Pinaagi sa suporta sa donor-partner nga BIRTH ug sa District Deputy Grand Masters sa grupong Mason, MD NCR-H, matag eskwelahan nakadawat og 30 ka desktop computer sets ug usa ka 55-inch television monitor. Ang maong mga kagamitan gilauman nga makatabang sa pagpalapad sa access sa mga estudyante sa modernong teknolohiya ug sa pagpalig-on sa digital learning sa ilang edukasyon.
Mitambong usab sa maong kalihokan sila BIRTH President Dante E. Tan, Surigao del Sur 2nd District Representative Alexander T. Pimentel, Cantilan Mayor Philip Pichay, mga opisyal ug kawani sa Schools Division Office, ingon man ang ubang mga representante gikan sa nagkalain-laing mga eskwelahan.
Sumala sa DepEd, ang maong inisyatiba kabahin sa padayon nga paningkamot aron mas mapalambo ang kalidad sa edukasyon pinaagi sa teknolohiya ug sa pag-andam sa mga estudyante alang sa digital nga kalibotan.
Photo coutrtesy: DepEd
