Patay ang usa ka mag-uuma human kining gipusil sa senior citizen, sa Barangay Ima, lungsod sa Sison, Surigao del Norte.
Ang biktima naila nga si Leo Deloy Becina, 43 anyos, usa ka mag-uuma ug residente sa nahisgutang barangay. Sumala sa imbestigasyon sa kapulisan, nahitabo ang pagpamusil alas 3:25 sa hapon kagahapon, Hulyo 26, diin giingong nagkasumpaki una ang biktima ug ang suspek hangtod miabot sa punto sa pag pamusil sa diin nalubngan og bala ang lawas sa biktima sa makadaghan nga higayon, nga nag resulta sa iyang hinanali nga kamatayon.
Naila usab ang suspek nga si Freddie Gardo Calang Abian, 67 anyos, residente sa Purok 1, Barangay Anomar, Surigao City, nga nasikop ra usab sa mga otoridad pinaagi sa hot pursuit operation.
Narekober gikan sa suspek ang usa ka kalibre .45 nga pistola, nga ana-a na sa Provincial Forensic Unit isip kabahin sa imbestigasyon sa nahitabong krimen.
Gilauman nga ipasaka karong adlawa pinaagi sa inquest proceedings ang kasong murder batok sa suspek. Sa pagkakaron, anaa na sa punerarya ang lawas sa biktima samtang ang suspek nagpabiling naka himas rehas sa Sison Municipal Police Station samtang nagpadayon ang legal nga proseso.
