Padayon karun nga gipangita ang 2-anyos nga bata human kini nawala niadtong adlaw nga Huwebes alas 10:30 sa buntag sa may Purok 3 Brgy. Camayahan, syudad sa Butuan.
Naila ang batang nawala nga si Ian Miñoza, residente sa nasangpit nga lugar. Sumala sa pamilya, samtang ang iyang inahan nanilhig sa ilang tugkaran, si Ian naa pa sa sulod sa balay ug nagtan-aw sa cellphone.
Apan pagbalik sa iyang inahan, ang cellphone na lamang ang nabilin ug wala na ang bata. Dali nga nagpatabang sa mga silingan ug pamilya apan wala nila makita ang bata, padayon nga gironda ang palibot lakip na ang kabukiran ug ubang lugar duol sa ilang pinuy-anan, apan hangtod karon wala pa gyud siya makita.
Giduolan sa ginikanan ang mananambal ug nagpatambag gumikan kay nagtuo sila nga gikuha kini sa engkanto. Nagbuhat na og ritwal sa luyo nga bahin sa ilang balay aron mangagpas nga mabalik ang bata.
