Sikop ang upat ka lalaki atol sa usa ka operasyon batok sa ilegal nga pagmina nga gipahigayon sa Criminal Investigation and Detection Group (CIDG) Surigao del Norte Provincial Field Unit, kauban ang Mines and Geosciences Bureau DENR ug Surigao City Police Station, sa Sitio Bedrock, Barangay Mabini, sa Surigao City.
Matud pa sa CIDG, nasakpan ang mga suspek nga nagpadayon sa ilang operasyon sa pagmina apan wala’y legal nga permit gikan sa Mines and Geosciences Bureau ug wala usab makapakita og mga dokumento nga nagtugot kanila sa pagproseso sa nakuhang bulawang mineral.
Sa maong operasyon, nakumpiska ang duha ka backhoe, walo ka sako sa gidudahang gold ore, sluice matting, metal hose o slurry pipe, water pump ug ubang kagamitan nga gigamit sa giingong ilegal nga pagmina. Ang kinatibuk-ang kantidad sa mga nakumpiskar nga ebidensiya gibanabana nga mokabot sa ₱9.5 milyon.
Gipasabot ni CIDG Director PMGEN Robert A.A. Morico II nga ubos sa Republic Act No. 7942 o Philippine Mining Act of 1995, ang tanang mineral nga anaa sa nasud kabtangan sa Estado ug ang pagmina kinahanglan nga adunay tukmang permiso ug mosunod sa mga balaod sa pagpanalipod sa kinaiyahan.
Dugang pa niya, ang ilegal nga pagmina mahimong hinungdan sa grabe ug dugayng kadaot sa kinaiyahan, lakip na ang kabukiran, kasuba-an, ug uban pang ecosystem, nga makaapekto usab sa panginabuhian ug kahimsog sa mga katawhan.
Gidayeg usab sa CIDG ang operasyon nga gipangulohan sa CIDG Regional Field Unit 13 ug CIDG Surigao del Norte PFU ubos sa OPLAN KALIKASAN, ug gi-awhag ang publiko nga magtinabangay pinaagi sa pagreport sa mga kalapasan batok sa kinaiyahan sama sa ilegal nga pagmina, quarrying, pagputol og kahoy, ug ilegal nga pagpangisda.
Photo Courtesy: PNP Criminal Investigation and Detection Group
