Nanghatag og ayuda ubos sa Unified Package for Livelihoods, Industry, Food, and Transport (UPLIFT) Assistance Program ang Department of Social Welfare and Development (DSWD), uban sa tabang sa Cebu City Department of Social Welfare and Services (DSWS).
Sa kinatibuk-an, 3,781 ka kwalipikadong benepisyaryo ang nakadawat sa maong ayuda. Niini, 2,491 ka benepisyaryo gikan sa South District sa Dakbayan sa Sugbo samtang 1,290 ka benepisyaryo gikan sa North District.
Ang mga benepisyaryo gipatawag sumala sa ilang barangay ug gihatagan og iskedyul aron masiguro ang hapsay ug organisadong pagpanghatag sa ayuda. Gipahimutang usab ang mga kawani sa DSWS ug DSWD aron motabang sa mga benepisyaryo ug pagsiguro sa hapsay nga dagan sa kalihokan.
Ang UPLIFT Assistance Program usa ka inisyatibo sa nasudnong gobyerno pinaagi sa DSWD nga naghatag og dugang pinansyal nga suporta sa mga kwalipikadong benepisyaryo aron makatabang sa pagpagaan sa epekto sa pagsaka sa presyo sa mga nag-unang panginahanglanon.
Ang maong kalihokan nagpakita sa padayon nga pagtambayayong tali sa DSWD ug sa kagamhanan sa Dakbayan sa Sugbo pinaagi sa DSWS aron masiguro nga ang mga kwalipikadong benepisyaryo makadawat sa husto, tukma sa panahon, ug sayon nga maabot nga ayuda gikan sa gobyerno.
Photo courtesy: Cebu City News
