Gipahimangnoan ang mga motorista nga mangandam sa laing dakong pagsaka sa presyo sa produktong petrolyo nga ipatuman karon nga semana. Base sa banabana sa industriya sa lana nga naggikan sa Mean of Platts Singapore ug foreign exchange averages sa milabay’ng upat ka adlaw, gilauman nga mosaka ang presyo sa diesel og P6.00 hangtod P6.50 matag litro, samtang ang gasolina mosaka og P5.50 hangtod P6.00 matag litro.
Sumala sa tinubdan sa industriya sa lana, misaka pag-usab ang presyo sa krudo sa kalibutan tungod sa kabalaka sa posibleng kakulang sa suplay sa lana. Gikatahong nga limitado gihapon ang pag-agi sa mga barko sa Strait of Hormuz, samtang nagkadako usab ang hulga sa seguridad sa Bab el-Mandeb Strait, nga nakapadako sa tensiyon sa rehiyon ug nakaapekto sa suplay sa enerhiya ug kalibutang pamatigayon.
Hinumduman nga niadtong Hulyo 21, misaka na usab ang presyo sa mga produktong petrolyo diin nadugangan ang gasolina og P3.50 hangtod P3.65 matag litro, ang diesel og P10.00 hangtod P10.68 matag litro, ug ang kerosene og P11.60 hangtod P11.77 matag litro.
Tungod niini, ang kinatibuk-ang netong pagsaka sa presyo karong tuig miabot na sa P49.92 matag litro sa gasolina, P50.43 matag litro sa diesel, ug P48.39 matag litro sa kerosene, base sa ika-29 nga oil price adjustment karong 2026.
Photo Courtesy: Philippine News Agency
