Limitado lamang sa 30 kilos nga bugas matag bulan ang mahimong ma-avail sa matag benepisyaryo sa P20 Rice Program sa Food Terminal Incorporated, uban sa Provincial Government of Zamboanga del Sur.
Matud ni Zamboanga del Sur Provincial Agriculturist Dante Lao-ay, gitakda ang maong limitasyon aron masiguro nga mas daghang kwalipikadong benepisyaryo ang makabenepisyo sa gisubsidya nga bugas.
Segun ni Lao-ay, ang 30 kilos nga bugas mahimong mapalit sa tulo ka higayon, tungod kay gitugotan lamang ang matag benepisyaryo nga makapalit og 10 kilos nga bugas kada transaction sulod sa usa ka bulan.
Pinaagi sa P20 Rice Program, ang mga kwalipikadong benepisyaryo mahimong makapalit ug bugas sa kantidad nga 20 pesos kada kilo, ubos sa gitakdang kondisyon ug proseso sa programa.
Gipahinumdoman usab ni Lao-ay ang mga benepisyaryo nga sundon ang mga lagda ug limitasyon sa programa aron mapadayon ang hapsay ug patas nga pag-apod-apod sa gisubsidiya nga bugas.
Ang P20 Rice Program gitumong sa paghatag og mas barato nga bugas ngadto sa mga kwalipikadong sektor ug pamilya nga nanginahanglan og dugang suporta sa ilang pang-adlaw-adlaw nga panginahanglanon.
Photo Courtesy: Philippine News Agency
