Gipalig-on sa Provincial Government of Zamboanga Sibugay ang industriya sa rubber pinaagi sa ₱235-milyong Rubber Consolidation, Processing and Marketing Enterprise, usa ka joint venture tali sa PLGU ug Timarbemco sa Tungawan. Sumala kang Provincial Agriculturist Wesley Sayson, ang Probinsya Zamboanga Sibugay maoy implementing proponent samtang ang Timarbemco maoy co-manager sa proyekto.
Matod niya, gi-upgrade ang assembly line sa mga makina aron mahimong mas moderno ug awtomatiko ang produksiyon sa CPR 20, nga makapahimo sa pagproseso sa rubber sulod lamang sa usa ka adlaw.
Dugang pa ni Sayson, makabenepisyo ang mga rubber farmers pinaagi sa dugang nga ₱1 premium matag kilo sa ilang ibaligyang rubber cuplumps, dugang sa quarterly incentive kon molapas sa 55 porsiyento ang recovery rate.
Gawas niini, ang bahin sa kita sa proyekto ibalik usab sa mga mag-uuma pinaagi sa mga programa sa pagpalambo sa industriya sa rubber. Giawhag usab ang mga mag-uuma sa paggamit sa New Improved Technology sa Philippine Rubber Research Institute (PRRI), lakip ang pagtanom sa mga recommended clones, aron mapataas ang produksiyon sa latex ug mas madugangan ang ilang kita.
Photo Courtesy: Rubber Journal Asia
