Gipahigayon sa Barangay Tipanoy ang grupo sa City Mayor’s Office–Iligan City Anti-Drug Abuse Council (CMO-ICADAC) pinaagi sa PCE Team aron maghimo sa Drug Symposium ug Awareness Campaign nga pinangulohan sa BADAC Vice Chairman nga si Reneboy B. Oranda, sa pakigtambayayong sa Philippine Drug Enforcement Agency (PDEA).
Atol sa kalihokan, gipasabot sa PDEA ang mga nag-unang probisyon sa Republic Act No. 9165 o Comprehensive Dangerous Drugs Act of 2002, ug gipasiugda ang makadaot nga epekto sa ilegal nga droga sa indibidwal, pamilya, ug komunidad.
Human sa symposium, gipahigayon usab ang Drug Test Orientation nga gipangulohan ni Aminoden B. Camarudin, PCE Team Leader, aron mapalalom ang kahibalo sa mga partisipante bahin sa husto nga pamaagi ug katuyoan sa drug testing.
Gisundan kini sa question-and-answer activity diin tulo ka partisipante nga nakatubag og sakto nakadawat og duha ka kilo nga bugas isip ganti.
Natapos ang kalihokan pinaagi sa lecture ni PMSg Analisa T. Banggawan bahin sa Violence Against Women and Children (VAWC), nga nagtumong sa pagpalig-on sa kahibalo sa publiko sa pagpanalipod sa kababayen-an ug kabataan ug sa paglikay sa mga matang sa pang-abuso.
