Ipatuman na sa City Government sa General Santos ang hingpit nga pagsira sa red-tagged zone sa Fish Section Phase A sa General Santos City Public Market sulod ning semanaha aron mapadali ang pagbalhin sa tanang apektadong vendor ngadto sa relocation site sa P. Acharon Boulevard.
Sumala kang Paulito Maquilang, Market Supervisor III, gipatawag na ang presidente ug bise presidente sa asosasyon sa mga vendor sa isda aron hisgutan ang pagbalhin. Matod niya, nagbarug ang mga lider sa asosasyon nga dili sila mobalhin hangtod dili usab tanan nilang kauban ang mopahawa sa maong lugar. Tungod niini, adunay pipila ka vendor nga una nang nibalhin apan mibalik sa ilang daang pwesto human wala usab mobalhin ang uban.
Dugang pa ni Maquilang, sugdan na ang pagtukod sa mga pasilidad sa relocation site, samtang ang mga temporaryong estruktura nga gitukod human sa linog ibalhin ngadto sa Santiago. Sa pag-abot sa mga materyales nga gamiton sa pagsira sa lugar, ipatuman na sa LGU ang permanenteng pagsira sa red-tagged zone sa Fish Section Phase A, aron mapugos ang tanang vendor sa pagbalhin ug masiguro ang ilang kaluwasan.
