Nadakpan sa mga awtoridad ang usa ka 33-anyos nga lalaki human aktong naglungkab og Piso WiFi Vendo Machine sulod sa Carmen Public Market probinsya sa Davao del Norte sa kaadlawon sa Hulyo 19, 2026.
Base sa report sa Carmen Municipal Police Station (MPS), alas 3:20 sa kaadlawon samtang nagpatrolya ang usa ka market guard uban sa iyang kauban sa sulod sa merkado, ilang nasakpan ang suspek nga gilungkab ang Piso WiFi Vendo Machine sa Yochang Store nga nahimutang sa Purok 7, Barangay Ising sa giingong lungsod ug probinsya.
Sa dihang namatikdan sa suspek ang presensya sa mga nagpatrolya, midagan aron makaiktad. Apan gigukod dayon siya sa market guard ug sa iyang kauban samtang nangayo usab sila og tabang sa kapolisan pinaagi sa radyo.
Pag-abot sa mga mobile patrollers sa Carmen PNP, napugngan na ang suspek ug dayon gidala sa estasyon sa kapolisan alang sa hustong proseso ug pagsang-at sa angay nga mga kaso.
Narekober gikan sa pagpanag-iya sa suspek ang usa ka itom nga sling bag, usa ka combination plier, duha ka Phillips screwdriver, usa ka slingshot o “Indian Pana,” usa ka headlamp, ug ₱990.00 nga kantidad sa mga sensilyo.
Padayon karon ang imbestigasyon sa Carmen Mnucipal Police aron matino ang tanang kahimtang sa maong insidente.
Photo Courtesy: PhilNews
