Padayon ang programa sa Philippine Rubber Research Institute (PRRI) pinaagi sa pagpalig-on sa Nursery Establishment ug Planting Materials aron masuportahan ang mga mag-uuma sa pagpalambo sa ilang panginabuhian.
Tumong niini ang paghatag og dekalidad nga mga punuan ug planting materials nga angay sa klima ug yuta sa matag komunidad.
Sumala ni Supervising Science Ressarch Meynard Abello nga pinaagi sa maayong pagdumala sa nursery, masiguro nga himsog ug lig-on ang mga punuan sa dili pa kini itanom sa uma. Makatabang usab kini sa pagdugang sa survival rate sa mga tanom, pagpausbaw sa produksyon, ug pagpakunhod sa gasto sa mga mag-uuma sa pagpangita og kalidad nga mga punuan.
Dako ang bili sa maong programa tungod kay naghatag kini og dugang nga oportunidad sa mga mag-uuma aron mapalambo ang ilang ani ug kita.
Ang paggamit sa sertipikado ug dekalidad nga planting materials usa ka importante nga lakang aron makab-ot ang mas taas nga ani ug mas lig-on nga produksyon sa umahan.
Nag-awhag ang PRRI sa tanang mga mag-uuma ug mga organisasyon sa komunidad nga aktibong moapil ug mosuporta sa Nursery Establishment ug Planting Materials Program.
Pinaagi sa panaghiusa ug husto nga pag-atiman sa mga punuan, masiguro ang malungtarong agrikultura ug mas maayong kaugmaon alang sa sektor sa panguma.
Photo Courtesy: DLR Elastomer Engineering
