Patay ang usa ka lalaki nga giilang si alyas “Dan” 52-anyos, mag-uuma, minyo, ug residente sa Brgy. Ynaguinayan, Pambujan, Northern Samar human kini gidunggab sa iyang ka-inom nga giilang si alyas “Earl,” 39 anyos, mag-uuma usab, minyo, ug nagpuyo sa samang lugar atol sa usa ka panagtapok sa naasoy nga Barangay, alas-7:00 ang takna sa gabii niadtong Hulyo 19, 2026.
Base sa inisyal nga imbestigasyon sa kapulisan, nagkainom ang biktima ug ang suspek uban sa ilang mga kauban sulod sa balay sa biktima sa dihang kalit lang miduol ang suspek ug gidunggab ang biktima sa likod ug dughan gamit ang usa ka hait nga hinagiban nga gitawag og “dipang” sa wala mahibaw-e nga hinungdan.
Human sa insidente, nakadagan pa ang biktima aron makalingkawas gikan sa suspek, apan wala na kini matabang tungod kay namatay usab kini pipila ka minuto ang milabay tungod sa grabeng samad nga iyang naangkon. Sa laing bahin, misurender ang suspek ngadto sa nag-duty nga barangay kagawad ug dayon gitugyan sa Pambujan Municipal Police Station aron atubangon ang hustisya. Samtang ang lawas sa biktima gidala sa Rural Health Unit (RHU) sa Pambujan alang sa autopsy ug dugang nga imbestigasyon.
Photo Courtesy: Wikipedia
