Tulo ka mga lalaki ang nadakpan human gibungkag sa kapulisan ang gituohang drug den atol sa implementasyon sa duha ka search warrants ubos sa OPLAN WAGNER sa Purok Kalipayan, Barangay Bongtud, Tandag City, sayong buntag sa Hulyo 20.
Ang operasyon gipahigayon sa mga operatiba sa City Drug Enforcement Unit (CDEU) sa Tandag Component City Police Station ubos sa pagmando ni PLTCOL Junyd D. Marohom, Acting Chief of Police, ug gipangulohan ni PCPT Kian Paul Mar T. Bargio, Deputy Chief of Police.
Sa alas 4:30 sa buntag, gisilbihan sa mga operatiba ang Search Warrant No. 2026-34 alang sa paglapas sa Republic Act 10591 o Comprehensive Firearms and Ammunition Regulation Act ug Search Warrant No. 2026-33 alang sa paglapas sa Republic Act 9165 o Comprehensive Dangerous Drugs Act of 2002.
Nadakpan ang target nga giila sa alyas “Wagner,” 34 anyos, residente sa Purok Kalipayan, Barangay Bongtud. Nadakpan usab ang duha pa ka mga indibidwal nga giila sa alyas “Meljun,” 30 anyos, construction worker ug residente sa Barangay Rosario, ug alyas “Ryan,” 31 anyos, walay trabaho ug residente sa Barangay Pandanon, Tandag City.
Atol sa operasyon, narekober sa kapulisan ang pipila ka sachet nga adunay puti nga kristal nga substansiya nga gituohang shabu, diin ang uban niini nakuha kang alyas “Wagner” ug alyas “Meljun”, samtang ang uban nakit-an sa nagkalain-laing bahin sa balay.
Nasakmit usab ang lain-laing drug paraphernalia lakip ang improvised tooters, improvised drug holder, ug mga lighter nga gituohang gigamit sa paggamit og ilegal nga droga.
Dugang pa niini, narekober usab sa mga operatiba ang usa ka kalibre .38 nga revolver, tulo ka buhing bala, usa ka itom nga sling bag, ug usa ka blue nga pencil case nga gigamit sa pagtago sa pipila sa mga ebidensiya.
Ang mga nadakpan, anaa na sa kamot sa kapulisan alang na sa saktong disposisyon.
Photo courtesy: Tandag CCPS
