Natabunan ang upat ka balay sa landslide human sa kusog ug padayon nga pag-ulan sa daplin sa Davao-Bukidnon Highway sa Marahan, Barangay Marilog, Marilog District, Davao City, niadtong nakalabay nga adlaw.
Tungod sa pagkahumok sa yuta, nidahili ang bahin sa highway paingon sa ubos diin nahimutang ang mga balay. Tungod niini, temporaryong gipahunong ang pag-agi sa mga sakyanan sa maong dalan.
Matud ni Barangay Marilog Chairwoman Jeanette Suam, upat ka balay ang naguba sa maong landslide. Samtang padayon pa nilang gisusi kung adunay mga residente nga nasamdan o wala pa makit-i. Sa pagkakaron, padayon ang disaster response ug mitigation operations sa mga awtoridad.
