Naghatag og cash assistance ang Probinsyal nga Panggamhanan sa Maguindanao del Sur ngadto sa mga biktima sa pagbusikad sa granada nga nahitabo sa Barangay Poblacion, Shariff Aguak niadtong Hulyo 18 niining tuiga. Ang maong tabang, gipadali, human sa direktiba ni Governor Datu Ali Midtimbang aron matabangan ang mga naapektuhan sa insidente.
Gipangunahan sa Provincial Disaster Risk Reduction and Management Office (PDRRMO) sa pagpanguna ni Windy Anne Joy Beaty ang personal nga paghatod sa pinansyal nga ayuda ngadto sa mga biktima nga anaa karon sa IPHO Maguindanao ug sa Jhon Mark D. Villanueva Medical Clinic and Hospital alang sa ilang medical nga panginahanglan.
Sumala sa Provincial Government, ang cash assistance alang sa gasto sa tambal, pagpahospital ug uban pang panginahanglan sa mga biktima. Gipasalig usab sa lokal nga panggamhanan nga padayon ang ilang suporta hangtod sa ilang hingpit nga kaayohan.
Photo Courtesy: PDRRMO Maguindanao del Sur
