Narekober sa mga tropa sa 4th Infantry (Diamond) Division, Philippine Army ang pito (7) ka high-powered firearms atol sa nagkalain-laing focused military operations niadtong Sabado, Hulyo 18, 2026, isip kabahin sa padayon nga kampanya sa pagmintinar sa Stable Internal Peace and Security (SIPS) sa Caraga Region.
Sa Barangay Kolambugan, Sibagat, Agusan del Sur, malampusong narekober sa hiniusang tropa sa 3rd Special Forces Battalion ubos sa 401st Infantry Brigade, 4ID, ug 67th Infantry Battalion sa 10th Infantry Division, ang unom (6) ka high-powered firearms pinaagi sa impormasyon nga gihatag sa mga kanhi miyembro sa rebeldeng grupo ug sa padayon nga military operations sa maong lugar.
Lakip sa mga narekober mao ang duha (2) ka M16 rifles, duha (2) ka AK-47 rifles, usa (1) ka M1 Garand rifle, ug usa (1) ka homemade shotgun.
Sa laing operasyon sa samang adlaw, hiniusang naglihok ang 3rd Special Forces Battalion, 36th Infantry Battalion, ug Philippine National Police (PNP) sa Barangay Maitum, Tandag City, diin ilang narekober ang usa (1) ka M16 rifle, duha (2) ka anti-personnel improvised explosive devices (IEDs), mga magasin, ug mga bala.
Matod ni Brigadier General Benjamin L. Leander, Commander sa 401st Infantry Brigade, ang kalampusan sa operasyon nagpakita sa kaepektibo sa intelligence-driven operations ug sa nagkadako nga suporta sa mga komunidad sa kampanya sa gobyerno batok sa armadong panagsangka.
Dugang pa niya, ang matag armas nga marekober makapakunhod sa kapasidad sa Communist Terrorist Group (CTG) sa pagpahigayon og mga lihok nga makapameligro sa kaluwasan sa katawhan.
Samtang, gidayeg usab ni Major General Marion T. Angcao, Commander sa 4th Infantry Division, ang hiniusang tropa alang sa ilang malampusong operasyon.
Matod niya, bisan pa og nadeklarar na nga adunay Stable Internal Peace and Security (SIPS) ang tibuok Caraga ug nabungkag na ang tanang yunit sa CTG sa rehiyon, magpadayon gihapon ang Armed Forces of the Philippines sa focused military operations aron mapreserbar ang kalinaw ug mapugngan ang posibleng pagbangon pag-usab sa mga armadong grupo.
Photo courtesy: 3rd Special Forces Battalion
