Mokabat sa P600,000.00 nga kantidad sa sulod sa usa ka piggy bank ang nadala sa duha ka wala mailhing armadong suspetsado nga gikatahong nanulis sa usa ka balay sa Barangay Baguitan, Guipos, Zamboanga del Sur, mga alas 12:30 adlaw’ng Byernes, Hulyo 17, 2026.
Base sa imbestigasyon sa Guipos Municipal Police Station, ang duha ka suspetsado nga nagsul-ob og itom nga jacket nga nagsakay sa puti nga Yamaha Aerox 155, pugsanon nga misulod sa balay sa 81-anyos nga biktima.
Sa sulod sa balay, giguyod matud pa sa mga suspetsado ang maong biktima nga 81-anyos ug gihulga pinaagi sa dalang rifle nga gigapos pa ang mga kamot ug gitabonan ug masking tape ang baba sa biktima.
Human niini, gipangita sa mga suspetsado ang nahimutangan sa piggy bank nga gipanag-iyahan sa 24-anyos nga apo sa biktima nga gibana-banang may sulod nga P600,000.00.
Sa nakuha na sa mga suspetsado ang piggy bank, gilayon sila nga nigawas agi sa likod nga bahin sa balay ug misibat paingon sa Barangay Sikatuna, Guipos, Zamboanga del Sur.
Sa karon, nagpadayon pa ang follow-up investigation ug hot pursuit operation sa Guipos Municipal Police Station aron mailhan ug madakpan ang mga responsable sa maong pagpanulis.
Photo Courtesy: ZSPPO
