Nakadawat og talagsaong ganti ang liboan ka empleyado sa Hari Krishna Exports, usa sa pinakadakong kompanya sa diamante sa India, diin gihatagan sila og mga sakyanan, mga apartment ug mga alahas isip pasidungog sa ilang dugay’ng serbisyo ug dedikasyon sa trabaho.
Gimugna ang maong kompanya ni Savji Dholakia, nga nailhan sa paghatag og dagkong insentibo sa mga empleyado panahon sa selebrasyon sa Diwali.
Sa usa sa pinakadakong awarding sa kompanya, kapin sa 1,260 ka mga sakyanan ug 400 ka apartment ang gipanghatag sa mga kwalipikadong empleyado, uban pa sa mga alahas, isip pagpasalamat sa ilang maayong performance, maayong attendance, ug pagkamatinud-anon sa kompanya.
Matud pa sa kompanya, dili tanan nga empleyado makadawat og dagkong ganti matag tuig. Ang mga mapili gibase sa ilang performance, disiplina, ug gidugayon sa serbisyo, samtang ang mga nakadawat na kaniadto mahimong dili na maapil sa sunod, aron hatagan usab og higayon ang ubang empleyado.
Gipasiugda ni Dholakia nga ang kalampusan sa negosyo kinahanglan usab nga maambit sa mga trabahante nga mitabang sa pagtukod ug pagpalambo sa kompanya. Alang kaniya, ang maong mga ganti dili lamang simbolo sa pagkamanggihatagon, kondili usa usab ka paagi aron mapauswag ang kalidad sa kinabuhi sa iyang mga empleyado ug mapakita ang pagpasalamat sa ilang paningkamot.
Nakapukaw ang maong inisyatiba og daghang reaksyon sa tibuok kalibotan. Adunay mga nagdayeg niini isip ehemplo sa maayong pag-atiman sa mga empleyado, samtang adunay usab nagtuo nga mas importante gihapon ang lig-on nga sweldo ug dugay’ng benepisyo kaysa sa dagkong ganti nga usahay lamang ihatag.
Bisan pa niini, daghan ang miila nga ang maong mga ganti nakapausab sa kinabuhi sa daghang empleyado ug sa ilang mga pamilya, ilabina sa mga nakapanag-iya sa ilang unang balay o sakyanan pinaagi sa programa sa kompanya.
Photo Courtesy: Hindustan Times
