Balhog na sa prisohan ang giila nga Top 2 Most Wanted Person sa probinsya human kini masikop sa mga otoridad didto sa lungsod sa Marihatag, Surigao del Sur niadtong Miyerkules sa buntag, Hulyo 15, 2026.
Giila ni Police Colonel Jeffrey Lawrence D. Mauricio, ang Provincial Director sa Surigao del Sur Police Provincial Office (SDSPPO), ang dinakpan nga si alyas “El-El”, 34-anyos, usa ka mag-uuma, ug residente sa Purok 1, Barangay Antipolo sa maong lungsod.
Ubos sa pamunoan ni Police Captain Emil S. Barro, ang Acting Chief of Police sa Marihatag Municipal Police Station, gisilbi sa mga operatiba ang Warrant of Arrest batok sa suspek sa may alas 8:30 sa buntag tungod sa bug-at nga kasong Murder.
Ang maong kamanduan sa pagdakop giisyu niadtong Hulyo 2, 2026, ni Presiding Judge sa 11th Regional Trial Court (RTC), Branch 28, nga nagbase sa Lianga, Surigao del Sur. Walay girekomendang piyansa ang korte alang sa temporaryong kagawasan sa suspek.
Tungod niini, nagtingkagol na karon si alyas “El-El” sa selda sa kapulisan samtang giandam ang mga gikinahanglan nga dokumento alang sa pag-turnover kaniya ngadto sa korte nga nagkupot sa iyang kaso.
photo courtesy:SDSPPO
