Nasikop ang usa ka 20-anyos nga estudyante human makuhaan og gituohang marijuana atol sa usa ka nakaiskedyul nga police checkpoint sa National Highway, VLP Boulevard, Barangay Bag-ong Lungsod, Tandag City, sa gabii niadtong Hulyo 15, 2026.
Sumala sa Tandag Component City Police Station (CCPS), ang operasyon gipahigayon sa ilang mga personahe ubos sa pagpanguna ni PLTCOL Junyd D. Marohom, Acting Chief of Police, isip kabahin sa gipakusog nga kampanya sa Philippine National Police batok sa ilegal nga droga ug uban pang kriminalidad.
Atol sa pag inspeksyon sa checkpoint, nakumpiska gikan sa suspek nga giila lamang sa alyas “Kol2x,” residente sa Barangay Bungtod, Tandag City, ang usa ka sachet nga adunay uga nga mga dahon, liso, bulak, ug bunga sa tanom nga gituohang marijuana.
Gikumpiska usab sa kapulisan ang motorsiklo nga gigamit sa suspek atol sa operasyon. Ang nakumpiskang gituohang marijuana adunay gibana-banang gibug-aton nga tulo ka gramo ug adunay gibanabanang Standard Drug Price (SDP) nga ₱360.00.
Gipahibalo sa kapulisan ang suspek sa iyang mga katungod ubos sa Konstitusyon ug gidala kini sa kustodiya sa Tandag CCPS alang sa hustong dokumentasyon ug pagsang-at og kaso tungod sa giingong paglapas sa Section 11, Article II sa Republic Act No. 9165 o Comprehensive Dangerous Drugs Act of 2002.
Ang nakumpiskang ebidensya ipadala sa Regional Forensic Unit alang sa laboratory examination aron mapamatud-an ang matang niini.
Photo courtesy: PNP Tandag
