Nasikop sa kapulisan ang usa ka 56 anyos nga babaye atol sa gilunsad nga “Manhunt Charlie” operation sa Purok 6D, Feeder Road 2, Barangay Tibal-og, Santo Tomas, Davao del Norte, alas 10:36 sa gabii, Hulyo 13, 2026. Ang suspek, nga usa ka minyo nga negosyante ug benepisyaryo sa non-government organization, gidakop sa hiniusang operasyon sa mga sakop sa Santo Tomas Municipal Police Station (MPS), DNP-Intelligence Unit (DNPIU), PIDMU, ug 2nd Davao del Norte Provincial Mobile Force Company ( 2nd DNPMFC).
Ang pagdakop gihimo pinaagi sa Warrant of Arrest nga gipagawas ni Presiding Judge Gemma G. Betonio sa Regional Trial Court, Branch 4 sa Panabo City, Davao del Norte, kabahin sa Criminal Case No. 465-2026 tungod sa giingong paglapas sa Republic Act 11199 o Social Security Act of 2018.
Gitakda usab sa korte ang piyansa nga P72,000 alang sa iyang temporaryong kagawasan. Human sa pagdakop, gidala ang suspek sa kustodiya sa Santo Tomas MPS samtang giproseso dayon sa kapulisan ang pormal nga pagbalik sa warrant ngadto sa korte aron mapadali ang pag-isyu sa commitment order ug ang sunod nga legal nga proseso.
Photo Courtesy: The Independent
