Human sa dul-an unom ka tuig sukad gikawat ang usa ka bulawang inidoro nga nagkantidad og kapin ₱340 milyon, duha sa mga suspek ang gisentensiyahan na sa korte sa England.
Ang maong artwork nga gitawag og “America”, nga hinimo sa 18-karat nga bulawan ug may gibug-aton nga 196 ka libra, kaniadto gipakita sa Blenheim Palace sa Oxfordshire. Bisan og hingpit kining magamit isip kasilyas, gihimo kini isip usa ka satirikong obra sa art nga nagsimbolo sa sobra nga kadato.
Base sa desisyon sa Oxford Crown Court, si James Sheen, 40-anyos, gisentensiyahan og upat ka tuig nga pagkabilanggo human miangkon sa kaso sa pagpangawat, conspiracy ug pagbalhin sa gikawat nga kabtangan. Samtang si Michael Jones, 39-anyos, gisilotan og duha ka tuig ug tulo ka bulan nga pagkabilanggo.
Bisan pa sa pagkadakop sa mga suspek, wala na gayod marekober ang bulawanong inidoro. Nagtuo ang mga awtoridad nga kini giputol-putol na ug gibaligya ang bulawan.
Ang maong artwork gimugna sa Italian artist nga si Maurizio Cattelan, ug nahimong usa sa labing nailhang kontrobersiyal nga mga obra sa art sa kalibotan.
Hangtod karon, wala pa gihapon masubay ang nahimutangan sa nawala nga bulawanong inidoro.
