Balhog sa prisohan ang usa ka lalaki nga mag-uuma human nasakmitan ug droga sa gipahigayon nga drug buy-bust operation sa kapulisan sa Tubod, Brgy. Galas, Dipolog City niadtong hulyo 12 ning tuiga.
Giila ang dinakpan nga si alyas Dodong, 23 anyos, ulitawo ug residente sa Banicapt sa susamang barangay. Nasakmit gikan sa suspetsado ang 1 ka gamay nga pakete sa shabu nga nagsilbing buy bust item ug laing 6 ka gagmayng pakete sa shabu nga nakuha gikan sa iyang posisyon.
Dugang nasakmit gikan sa posisyon sa dinakpan ang 500 peso bill nga buy bust money, ug mga non-drug items. Motimbang sa duha ka gramo ang nasakmit nga druga nga nagkantidad ug Php13,600.00.
Gipangunahan ang maong operasyon pinaagi sa mga personahe sa Zamboanga del Norte Provincial drug Enforcement Unit kauban ang Dipolog City Police Station, 901st MC RMFB 9, Regional Intelligence Division 9 ug sa koordinasyon sa PDEA 9.
Gidala ngadto sa kustudiya sa Dipolog CPS ang dinakpan ug mag-atubang sa kasong paglapas sa RA 9165 kon Comprehensive Dangerous Drugs act of 2002.
Photo Courtesy: Eva Lim
