Gibutyag sa Provincial Disaster Risk Reduction and Management Office (PDRRMO) Zamboanga del Sur nga adunay 14 ka mga munisipalidad sa probinsya nga giila nga flood-prone o daling mabahaan ilabina panahon sa kusog nga ulan.
Matud ni PDRRMO Head Ret. PBGEN Atty. Faro Antonio Olaguera, pipila niini nga munisipalidad ang lungsod sa Dinas, Labangan, Tukuran, Dumalinao, Tambulig, Dumingag, Lakewood, Bayog,Kumalarang ug uban pa.
Samtang gihinganlan usab ni Atty. Olaguera ang pipila ka mga munisipalidad nga nailang mga landslide prone areas nga gilangkuban sa Lakewood, Bayog, Tigbao, ug sa Lison Valley, Pagadian.
Segun ni Atty. Olaguera, padayon ang ilang pagmonitor sa kahimtang sa panahon ug sa lebel sa tubig sa mga suba aron malikayan ang mas dakong peligro sa komunidad.
Gidasig usab niya ang publiko nga likayan ang pagtabok sa mga tubig baha ug magmatngon sa mga update gikan sa DOST PAGASA ug sa mga Local DRRM Offices aron masiguro ang kaluwasan sa matag usa.
