Gitinguha sa Local Government Unit sa Dumalinao, Zamboanga del Sur nga mapatuman ang speed limit sa National Highway aron mapakunhod ang mga aksidente ug mapanalipdan ang kinabuhi sa mga motorista ug pedestrian sa maong lungsod.
Matud ni Dumalinao Mayor Raul Famor, ang maong plano nagtumong sa pagdisiplina sa mga motorista ug pagpugong sa sobra ka paspas nga pagpadagan sa mga sakyanan ug siya malaumon nga masundog sa iyang munisipalidad ang maayong pagpatuman sa speed limit sama sa Dakbayan sa Davao, diin nailhan ang mga motorista nga may mga disiplina.
Segun niya, ang higpit nga pagpatuman sa speed limit kabahin sa ilang kampanya alang sa mas luwas nga kadalanan alang sa tanang lumalabay sa lungsod sa Dumalinao.
Gidasig usab niya ang tanang drivers nga kon magpatuman na sa gitakdang speed limit ang LGU, sundon lang kini aron malikayan ang disgrasya ug mapadayon ang kaluwasan sa tanang lumalabay.
Siya malaumon usab nga sa dili madugay hingpit nang mapasar ang ordinansa nga nagpaluyo sa pagpatuman sa speed limit aron masiguro ang luwas ug hapsay nga dagan sa trapiko sa lungsod sa Dumalinao.
