Gipasabot sa Office of Civil Defense (OCD) Region 9 ang publiko nga dili lang ting-init ang mahimong epekto sa El Niño, tungod adunay posibilidad nga ang nasud makasinati sa “wet part” o panahon nga adunay pag-ulan ug “dry part” o panahon nga adunay taas nga temperatura ug ubos nga pag-ulan.
Sa pakighinabi sa Juander Radyo News Team, gipahayag ni OCD-9 Regional Director Atty. Ruel Halanes, nga ang wet part mahimong magdala og mga pag-ulan sa pipila ka mga lugar bisan adunay El Niño, og niining higayona mas kusog ang mga bagyo nga moigo nga makaapekto sa nasud.
Dugang pa ni Atty. Halanes, nga ang dry part gilaumang magsugod sa bulan sa Oktubre, Nobyembre, Disyembre ug mahimong molungtad hangtod sa unang quarter sa tuig 2027, nga posibleng magdala og taas nga temperatura ug minos ang pag-ulan sa daghang mga lugar.
Niini, gidasig sa ni Atty. Halanes ang publiko nga usbon ang panglantaw nga ang El Niño dili lamang nagpasabot og grabe nga kainit, kondili mahimong adunay wet ug dry nga mga kahimtang sa panahon, aron maandam ug malikayan ang posibleng kadaot sa kinabuhi ug kabtangan.
