Nakaangkon og mga samad ang walo ka indibidwal human nagbangga ang BJMP jail transport vehicle ug usa ka depasaheroang multicab didto sa National Highway, Barangay Kilada, Matalam, Cotabato niadtong Hulyo 8 niining tuiga, pasado alas 8:00 sa buntag. Lakip sa mga naangol ang BJMP personnel, upat ka Persons Deprived of Liberty (PDLs) ug mga sibilyan.
Sumala sa report, giingong misulay paglikay ang drayber sa BJMP van sa usa ka motor, atol sa kusog nga ulan, apan tungod sa danlog nga dalan, nawad-an kini og kontrol ug nabanggaan niini ang kasugat nga multicab, ayha pa kini nibangga sa poste sa kuryente.
Gidala dayon sa hospital sa Kabacan ang mga samaran aron matambalan. Sa kasamtangan, padayon ang imbestigasyon sa Matalam Munipal Police, aron masayran ang tinuod nga hinungdan sa aksidente. Nagpahimangno usab ang kapulisan sa mga motorista nga mag-amping sa pagdrayb, ilabina panahon sa ting-ulan.
Photo Courtesy: PLTCOL Marvin C. Hugos
