Gimando ni President Ferdinand Marcos Jr. ang pagpatuman sa whole-of-government approach aron masiguro ang hingpit nga kaandam sa tanang ahensya sa gobyerno batok sa gilaumang pagsulod sa usa ka super typhoon niining semanaha.
Sumala ni Palace Press Officer Claire Castro, nakigkoordinar na ang Malacañang sa National Disaster Risk Reduction and Management Council (NDRRMC) aron masiguro nga andam ang tanang mga ahensya sa gobyerno sa posibleng epekto sa bagyo.
Lakip sa mga gimando sa Presidente ang pagpahigayon og pre-disaster risk assessment scenario meetings sa mga rehiyong gilauman nga maapektuhan sa sama sa kusog nga bagyo.
Gipasailalom usab sa widest alert ang mga response clusters sa NDRRMC ug Regional Disaster Risk Reduction and Management Councils (RDRRMCs) aron mapaspasan ang pagresponde sa bisan unsang emerhensiya.
Gimandoan usab ang mga lokal nga panggamhanan nga sugdan na ang preemptive evacuation sa mga residente nga nagpuyo sa mga high-risk o delikadong lugar. Gihatagan usab og direktiba ang mga LGU nga masiguro ang kaluwasan sa mga evacuation center ug mag-andam og mga lugar alang sa mga alagang hayop ug kahayopan.
Dugang pa niini, gisugo ang mga ahensya sa gobyerno sa pagpre-position sa mga rescue teams, relief goods, ug uban pang importanteng suplay, pag-ila sa alternatibong mga ruta, ug pag-inspeksyon sa mga kritikal nga imprastraktura.
Kabahin usab sa direktiba ang posibleng pagpatuman og sea travel ban kon gikinahanglan, paghatag dayon og tabang sa mga vulnerable sectors, ug pagmonitor sa mga sakit nga mahimong motumaw tungod sa pagbaha.
Photo courtesy: Philippine News Agency
