Kapin P13.8 milyon nga financial assistance ang gipanghatag sa Department of Science and Technology (DOST)-Caraga ngadto sa unom ka Micro, Small and Medium Enterprises (MSMEs) gikan sa nagkalain-laing lalawigan sa Rehiyon sa Caraga ubos sa Small Enterprise Technology Upgrading Program (SET-UP).
Ang maong pondo gitumong aron mapalambo ang produksyon sa mga benepisyaryo ug mapalig-on ang ilang kakompetensya sa natad sa negosyo. Magamit usab kini sa pagpalit og mga gikinahanglang ekipo ug dugang nga mga suplay aron mapalapad ang ilang operasyon.
Lakip sa mga benepisyaryo gikan sa Surigao del Sur ang CC Ice Plant and Cold Storage, MCCA Auto Repair Shop, Bert N’ Yong-i Auto Repair Shop, ug Citrus Hill Plantation. Samtang gikan sa Surigao del Norte ang Identitee Artworkz, ug gikan sa Agusan del Norte ang Brydomz Poultry Farm.
Gipangulohan ni DOST-Caraga Assistant Regional Director Ricardo Varela ang turnover ceremony diin gipahinumdoman ang mga benepisyaryo sa ilang mga responsibilidad isip kabahin sa programa.
Sumala sa DOST-Caraga, ang maong inisyatibo kabahin sa ilang padayon nga paningkamot sa pagpalambo sa innovation, paggamit sa modernong teknolohiya, ug paglig-on sa mga MSMEs aron makatampo sa pagtubo sa ekonomiya sa rehiyon.
Photo courtesy: DOST- CARAGA
