Gidakop sa mga operatiba sa Leyte Police Provincial Office (LPPO) ang usa ka giila nga Street-Level Individual (SLI) nga giila lamang sa alyas nga “Kimkim,” 32 anyos, walay trabaho ug residente sa Brgy. Poblacion, Albuera, Leyte atol sa gilusad nga operasyon didto sa naasoy nga lugar, niadtong nakalabay nga adlaw.
Sumala sa kapulisan, nakapalit ang poseur buyer og gidudahang shabu gikan sa suspetsado diin ila kining narekober lakip na ang uban pang ebidensiya nga may kalabutan sa ilegal nga droga.
Gipahigayon usab sa lugar sa pagdakop ang husto nga imbintaryo ug dokumentasyon sa mga nakompiskang ebidensiya atubangan sa suspetsado ug sa gikinahanglang mga testigo, subay sa Section 21 sa Republic Act No. 9165, nga giusab pinaagi sa Republic Act No. 10640.
Gipahibalo usab ang suspetsado sa hinungdan sa iyang pagdakop ug sa iyang mga katungod sumala sa Konstitusyon sa pinulongang iyang nasabtan. Ang mga nakompiskang gidudahang droga ipadala sa Regional Forensic Unit 8 alang sa laboratory examination, samtang giandam na sa kapulisan ang pormal nga pagsang-at sa mga kasong kriminal batok kaniya sa tukmang hukmanan.
Photo Courtesy: PNP LPPO
