Nagpagawas ang Lokal nga Panggamhanan sa Tandag ubos sa pagpanguna ni Mayor Roxanne Pimentel og Executive Order No. 26, Series of 2026, nga nagdeklarar og “No Sailing Policy” ug temporaryong nagdili sa tanang kalihokan nga may kalabutan sa baybayon, dagat, ug suba sulod sa dakbayan.
Sumala sa Executive Order, epektibo ang maong polisiya sugod karong adlawa, Hulyo 8, 2026 ug magpabilin kini hangtod nga opisyal nga bawion sa lokal nga panggamhanan.
Gipatuman ang maong lakang isip pagpangandam batok sa posibleng daotang epekto sa Super Typhoon Bavi, nga pagatawgon og “Inday” sa higayon nga mosulod kini sa Philippine Area of Responsibility (PAR).
Gidili sa maong mando ang tanan nga paglayag sa mga sakyanang pandagat ug ang pag-apil sa mga kalihokan sa baybayon, dagat, ug suba aron masiguro ang kaluwasan sa mga residente ug mga bisita atol sa hulga sa bagyo.
Giawhag usab sa City Government of Tandag ang tanang katawhan nga motuman sa maong executive order ug padayon nga magmonitor sa opisyal nga mga anunsyo ug weather advisories gikan sa lokal nga panggamhanan ug sa mga may kalabutan nga ahensya.
Photo courtesy: City Government of Tandag
