Mipahigayon og press conference ang Davao Light and Power Company niadtong Lunes sa buntag, Hulyo 6, 2026, human sa pagpagawas sa Energy Regulatory Commission (ERC) sa order nga nagtakda sa Davao Light isip bugtong distribution utility nga adunay pagtugot sa pag-operate, pagpaningil ug pagdawat sa bayad sa mga lugar nga sakop sa ilang gipalapad nga prangkisa.
Base sa order sa ERC nga gipatik niadtong Hulyo 3, 2026, giila nga ang Davao Light adunay balidong Provisional Certificate of Public Convenience and Necessity (CPCN) ug legal nga katungod sa pagdumala sa serbisyo sa kuryente sa Tagum City, Island Garden City of Samal, ug mga lungsod sa Asuncion, Kapalong, New Corella, San Isidro, ug Talaingod sa Davao del Norte.
Gisugo usab sa ERC ang Northern Davao Electric Cooperative (NORDECO) nga mohunong sa pagpaningil ug pagkolekta sa bayad sa maong mga lugar aron malikayan ang kalibog ug posibleng doble nga bayranan.
Gipasalig sa Davao Light ngadto sa mga residente ug negosyante nga apektado sa transisyon nga magpadayon ang suplay sa kuryente ug walay plano nga maputol ang serbisyo samtang ginahuman ang pagbalhin sa operasyon.
Ang maong pagbag-o resulta sa implementasyon sa Republic Act No. 12144 nga nagpalapad sa franchise area sa Davao Light ngadto sa pipila ka bahin sa Davao del Norte nga kaniadto giserbisyohan sa NORDECO.
