Nagpasalig ang pamunoan sa Police Regional Office 9 nga walay lugar sa Philippine National Police ang mga personnel nga malambigit sa illegal nga kalihokan, lakip ang giingong smuggling activity sa sigarilyo nga nalambigit ang duha ka personnel human sa anti-smuggling operation nga gipahigayon sa Barangay Punta Flecha, Pitogo, Zamboanga del Sur niadtong nakalabay nga adlaw.
Sa interview sa Juander Radyo News Team kang Police Major Shellamie Chang, Regional Public Information Officer sa PRO-9, iyang gibutyag nga “zero tolerance” ang ilang ipatuman sa duha ka police nga nalambigit sa smuggling activity.
Segon sa report tulo ka mga indibidwal ang nadakpan nga crew sa pumpboat, samtang duha pa ka mga suspek ang nakadagan, apan narekober usab sulod sa duha ka gibiyaang nga sakyanan ang mga police-issued uniforms, identification cards, ug uban pang government-issued items nga giingong iya sa duha ka police personnel nga karon naa sa PNP holding unit.
Gipasalig ni Major Chang nga manubag ang nalambigit nga police nga Police Corporal nga resindente sa Barangay Panubigan, Pitogo, Zamboanga del Sur ug Police Master Sergeant nga taga Zamboanga City.
Kun mapamatud-an ang ilang kalambigitan pinaagi sa hustong imbestigasyon, atubangon nila ang tukmang administratibo ug kriminal nga mga kaso subay sa balaod.
