Gisugdan na sa South Cotabato Provincial Hospital (SCPH) ang pagtanyag sa PhilHealth Outpatient Emergency Care Benefit (OECB).
Matod ni OPD Chief Dr. Anna Marie Tuburan, kini nga bag-ong programa para sa mga pasyente nga nanginahanglan og dinalian nga pagtambal (emergency) apan dili na kinahanglan nga i-admit o ma-confine sa ospital, o kadtong pwede nang ma-discharge sulod sa 24 oras.
Ubos niini, libre o abagahon sa PhilHealth ang gasto sa konsultasyon, laboratoryo, ug mga tambal aron maminusan ang out-of-pocket nga gasto sa mga residente ug makatabang sab sa pagpa-decongest sa mga ward sa ospital.
Alang sa mga wala pa’y PhilHealth, mamahimo silang magparehistro dayon pinaagi sa Point of Service (POS) sa ospital, ug giawhag usab sila sa pag-apil sa YAKAP program.
Aron mapahimuslan kini, kinahanglan lang magpakita og usa ka valid government ID, birth certificate, ug marriage certificate kung minyo. Tungod niini, giawhag sa SCPH ang mga South Cotabateños nga nakasinati og kalit nga sakit nga moadto dayon sa provincial hospital aron makadawat og de-kalidad ug daling maabot nga serbisyong medikal.
Photo Courtesy: Philippine News Agency
