Nadakpan sa kapulisan ang Top 3 Most Wanted Person sa municipal level sa Governor Generoso, Davao Oriental, human una nilang respondehan ang reklamo bahin sa usa ka viral nga video nga nagpakita sa pagbangga sa duha ka sakayang pangdagat sa Bislig City, Surigao del Sur.
Nahitabo ang pagdakop niadtong alas 5:45 sa hapon sa Hunyo 28, 2026, sa Purok 5, Market Site, Fish Port, Barangay Mangagoy, Bislig City.
Ang nadakpan giila lamang sa alyas “Jek2x,” 24-anyos, ulitawo ug mangingisda nga residente sa Purok 2, Padada Baybay, Barangay Magdug, Governor Generoso, Davao Oriental.
Sumala sa imbestigasyon, giingong hubog ang suspek sa dihang gituyo niya nga gibangga ang iyang gamit nga pump boat ngadto sa usa ka “pakura” o gamay’ng sakayan pangdagat sa reklamante. Tungod niini, adunay gamayng kadaot nga natala sa sakayan.
Atol sa pag-verify sa identidad sa suspek, nadiskobrehan sa mga operatiba sa Bislig City Component Police Station nga siya adunay naglungtad nga Warrant of Arrest tungod sa kasong paglapas sa Republic Act 7610 o ang Special Protection of Children Against Child Abuse, Exploitation and Discrimination Act.
Ang warrant gi-isyu pa niadtong Enero 26, 2022 sa Regional Trial Court, Branch 32 sa Lupon, Davao Oriental.
Gilayon nga gisilbihan sa mga kapulisan ang warrant ug gipahibalo ang suspek sa iyang mga katungod ubos sa balaod sa wala pa siya gidala sa Bislig City Component Police Station alang sa hustong dokumentasyon ug legal nga proseso, sa dili pa itugyan sa korte nga nagpagawas sa warrant.
Photo courtesy: SDSPPO
