Nakahatag og bag-ong paglaom ang Bureau of Jail Management and Penology (BJMP) Caraga ngadto sa mga Persons Deprived of Liberty (PDLs) human gipirmahan ang Memorandum of Agreement (MOA) uban sa Philippine Electronics and Communication Institute of Technology, Inc. (PECIT).
Pinaagi niini, ang mga PDL nga nagsilbi sa ilang silot mahimo nang makapadayon sa ilang pag-eskwela sa kolehiyo bisan pa man nga anaa sila sa piitan.
Sumala sa BJMP Caraga, ang maong programa nahimong posible pinaagi sa paningkamot sa Regional Welfare and Development Division, nga padayon sa pagpalambo sa mga programa alang sa rehabilitasyon ug pagbag-o sa kinabuhi sa mga PDL.
Gituohan sa BJMP nga pinaagi sa edukasyon, mas dako ang kahigayonan sa mga PDL nga makakat-on og bag-ong kahibalo ug kahanas aron makasugod pag-usab sa husto nga dalan sa ilang paggawas sa piitan.
Tumong usab sa programa nga maminusan ang posibilidad nga makabalik pa sila sa paglapas sa balaod ug mahimo silang produktibong miyembro sa komunidad.
Gipasiugda sa BJMP Caraga nga bisan anaa sa sulod sa piitan, adunay higayon ang matag usa nga makausab sa ilang kinabuhi, ug ang edukasyon mahimong yawe aron matuman ang ilang mga damgo ug makabaton og mas hayag nga kaugmaon.
Photo courtesy: BJMP Caraga
