Gipalig-on sa Nabunturan Municipal Police Station (MPS) ang pagpatuman sa seguridad sa mga eskwelahan aron masiguro ang kaluwasan sa mga estudyante ug kawani, nunot sa mga insidenteng nahitabo sa pipila ka mga tunghaan sa nagkadaiyang bahin sa nasud.
Sa pakighinabi sa Juander Radyo Nabunturan News Team, gipahayag ni Police Lieutenant Colonel Gomersendo L. Diwata II, hepe sa Nabunturan MPS, nga nagpahigayon na sila og mga inspeksyon sa mga eskwelahan aron masuta ug mapalig-on ang mga lakang sa seguridad nga makatabang sa pagpugong sa posibleng dautang panghitabo sulod sa mga campus.-
Matud pa sa opisyal, dinaliang nagpahigayon og aksyon ang lokal nga panggamhanan sa Nabunturan pinaagi sa pagpagawas og mando aron hisgutan ug mapalig-on ang mga polisiya sa kaluwasan sa tanang estudyante, dili lamang sa lungsod kondili usab sa ubang mga eskwelahan sa lugar.
Samtang, nagpahimangno si PLt. Col. Diwata sa mga ginikanan nga padayon nga bantayan ug giyahan ang ilang mga anak, ilabina sa ilang mga ginabuhat ug mga impluwensiya nga ilang masugatan sa social media, aron malikayan ang mga sitwasyong mahimong makahatag og peligro sa ilang seguridad.
