Nasikop ang usa ka 59-anyos nga mag-uuma sa Barangay Tigbawan, Pigcawayan, Cotabato, human sa gikasang search warrant implementation nga miresulta sa pagkarekober sa gidudahang ilegal nga droga, mga armas, ug usa ka fragmentation grenade. Giila sa kapulisan ang suspek nga si alyas Redentor ug residente sa maong lugar.
Sa operasyon nga gipahigayon sa hiniusang pwersa sa Pigcawayan Municipal Police Station, Provincial Police Drug Enforcement Unit, ug 2nd CPMFC, narekober ang usa ka shotgun, .45 caliber pistol, mga bala, ug usa ka MK2 fragmentation grenade.
Nakuha usab gikan sa suspek ang siyam ka pakete sa gidudahang shabu nga adunay gibana-banang kantidad og P24, 480.00, ingon man duha ka pakete sa gidudahang marijuana.
Sumala sa kapulisan, padayon nilang gipakusog ang kampanya batok sa ilegal nga droga ug armas aron masiguro ang kalinaw ug kahapsay sa komunidad.
Photo Courtesy: Pigcawayan Municipal Police Station
