Samaran ang usa ka pamilyang Badjao, lakip ang mga kabataan, human madisgrasya ang ilang gisakyan nga motor nga adunay sidecar kagahapon sa buntag, Hunyo 16, sa atubangan sa Ohana Beach Resort sa Sitio Banahaw, Barangay Sabang, Surigao City.
Sumala sa report sa kapulisan, nahitabo ang aksidente mga alas 7:10 sa buntag diin nalambigit ang usa ka Yamaha YTX125 nga motorsiklo nga may sidecar nga gimaneho ni Carlito Baculao Araman, 56-anyos, residente sa Sitio Panubigon, Barangay Lipata.
Lakip sa mga naangol ang daghang sakay sa sidecar, mga kabataan nga mga residente sa maong lugar. Base sa inisyal nga imbestigasyon, gikan sa Sitio Panubigon ang sakyanan ug padulong sa sentro sa siyudad sa dihang pag-abot sa dapit sa aksidente, kalit nga natangtang ang ligid sa sidecar.
Tungod niini, nawad-an og kontrol ang drayber ug mibangga sa usa ka poste. Ang tanan nga sakay nakaangkon og nagkalain-laing samad sa lawas ug gilayon nga girespondehan sa Quick Action Response Team ug gidala sa Caraga Regional Hospital alang sa medikasyon.
Sa ulahing impormasyon, kritikal ang kahimtang sa duha ka pasahero, lakip ang usa ka 42 anyos nga babaye ug usa ka 5 anyos nga batang lalaki, nga parehong giingong na-comatose tungod sa grabeng mga samad nga ilang naangkon.
Samtang adayon pa ang imbestigasyon sa kapulisan kabahin sa maong aksidente.
Photo Courtesy: Surigao City PNP
