Nadakpan na ang supek sa nahitabong pagpamusil-patay didto sa Albuera, Leyte, pasado alas 6:30 ang takna sa buntag kagahapong adlawa, Hunyo 15, 2026. Ang suspek giila nga si alyas “Totoy’ 27-anyos ug residente sa Sitio Upper, Barangay Antipolo, Albuera, Leyte, pasado alas 10:10 sa gabii sa susamang adlaw. Samtang ang iyang kauban nga si alyas “Berto,” nga naila usab sa imbestigasyon, nagpabiling gawasnon ug padayon nga gipangita sa mga awtoridad pinaagi sa mas pinalig-on nga manhunt operation.
Ang operasyon gilusad sa mga kapulisan sa Albuera Municipal Police Station (MPS) uban sa koordinasyon sa Provincial Intelligence Unit (PIU), 1st Leyte Provincial Mobile Force Company (LPMFC), ug Regional Task Force (RTF) “KAMURAYAW,” samtang dako usab ang nahimong tabang sa mga lumulupyo pinaagi sa ilang kooperasyon ug pagsuporta sa mga otoridad.
Atol sa operasyon, nasakmit sa mga kapulisan ang usa ka U.S. made 7.62mm M14 Springfield Armory rifle, usa ka M14 magazine, unom ka buok 7.62mm nga bala, usa ka R4 rifle nga walay serial number o marka, usa ka magazine niini, ug 25 ka buok 5.56mm nga mga bala.
Ang nadakpan nga suspek gipahibalo sa hinungdan sa iyang pagdakop ug sa iyang mga katungod ubos sa Konstitusyon sa pinulongang iyang nasabtan. Human niini, gidala siya sa Albuera MPS alang sa hustong dokumentasyon ug disposisyon.
Giandam na usab sa mga awtoridad ang angayng mga kasong kriminal batok kaniya.
Photo Courtesy:PNP LPPO
