Gipaambit karon sa Department of Labor and Employment (DOLE) ang mga pamaagi ug estratehiya aron hingpit nga maprotektahan ang mga kabataan batok sa child labor ug anti-child trafficking, ilabi na sa mga hilit nga dapit sa komunidad dinhi sa lalawigan.
Gipahayag ni DOLE Provincial Director Elamsali Ungad nga nagtinabangay na ang nagkadaiyang ahensya sa gobyerno aron masiguro ang kaluwasan sa mga bata pinaagi sa pagpakusog sa police visibility kauban ang mga Barangay Police Tanod ug mga Community-Based Organizations (CBO).
Gawas sa seguridad, dako usab ang papel sa Department of Education (DepEd) diin hugot nga gina-monitor sa mga magtutudlo ang presensya sa ilang mga estudyante. Kung kanunay absent ang usa ka bata, ang guidance counselor o ang mismong magtutudlo ang moadto sa ilang panimalay aron masuta ang tinuod nga rason sa iyang pagkawala.
Gipasiugda usab ni Ungad nga gikinahanglan ang saktong koordinasyon sa Lokal nga Kagamhanan aron mahatagan og panginabuhian o livelihood ang mga ginikanan. Matod pa niya, kung dili matabangan ang pamilya sa ilang pagkaon ug panginabuhian, mobalik-balik ra gihapon ang problema sa child labor tungod sa kalisod sa kinabuhi.
