Gipangandaman na sa Barangay Poblacion sa lungsod sa Nabunturan ang Araw ng Poblacion 2026 nga opisyal nga magsugod karong Hunyo 17,2026.
Gilauman nga mapuno sa nagkadaiyang kalihokan ang maong kasaulogan nga maghatag og kalingawan, serbisyo, ug mga programa alang sa katawhan.
Sa pakighinabi sa Juander Radyo Nabunturan News Team, gibutyag ni Punong Barangay Menchie B. Caballero nga nagsugod na gani kagahapon, Hunyo 15, ang pipila ka mga kalihokan isip kabahin sa selebrasyon. Matod niya, magpadayon ang sunod-sunod nga mga programa hangtod sa opisyal nga pagsugod sa kasaulogan aron masiguro ang malampusong pagdumala niini.
Dugang pa ni Caballero, dako ang iyang pasalamat sa suporta nga gihatag sa Gobyerno Probinsya sa Davao de Oro alang sa mga panginahanglanon sa maong kalihokan.
