Nadakapan ang duha ka lalaki kinsa giilang usa ka butcher ug usa ka laborer, sa gilusad nga joint drug buy-bust operation sa Purok Dacudao 5, Barangay JP Laurel, Panabo City Davao del Norte, niadtong Hunyo 12, 2026 sa gabie.
Giila ang mga dinakpan nga sila si alyas “Nel,” 26-anyos, minyo, nagtrabaho isip butcher, ug si alyas Jaymark, 20-anyos, ulitawo ug laborer. Parehong mga residente sa Purok Chico, Barangay Sto. Niño, sa giingong lungsod ug probinsya.
Sumala sa kapulisan, nasikop ang duha human akto kining napalitan sa poseur buyer sa maong kontrabando nga usa ka paglapas sa Republic Act 9165 kon Comprehensive Dangerous Drugs Act of 2002.
Narekober gikan sa ilang posesyon ang usa ka heat-sealed transparent plastic sachet nga adunay gituohang shabu ug laing pakete nga aduna usab sulod sa gituohang shabu, usa ka marked money nga P500 bill, ug usa ka itom nga coin purse.
Gibana-bana nga adunay gibug-aton nga 0.14 gramos ang nakumpiska nga gituohang shabu nga adunay standard drug price nga P1,000.96.
Sa pagkakaron, ang mga suspetsado ug mga nakompiska nga ebidensya anaa na sa kustodiya sa kapulisan alang sa hustong dokumentasyon ug disposisyon, samtang giandam na usab ang mga kasong ipasaka batok kanila.
Photo Courtesy : verywell mind
