Nakabenepisyo ang mga Persons Deprived of Liberty (PDLs) sa Montevista District Jail sa Davao de Oro sa serbisyo nga gipahigayon gahapong adlawa pinaagi sa koordinasyon sa Philippine Health Insurance Corporation (PhilHealth), Philippine Statistics Authority (PSA), ug Unicare aron ma-update ang ilang mga dokumento ug rekord alang sa mas maayong pag-access sa mga benepisyo.
Matod ni Jail Superintendent Carlos G. Lanzuela Jr, District Jail Warden sa Montevista, resulta kini sa koordinasyon nga gisugdan niaging bulan aron matagaan og hustong serbisyo ang mga PDL nga anaa sa ilang pasilidad.
Sumala kaniya, atol sa pag-interview sa Juander Radyo News Team kabahin sa kalihukan ang pag-update sa mga birth certificate pinaagi sa PSA ug ang pagproseso sa mga rekord sa PhilHealth aron mapadayon ang ilang membership ug uban pang benepisyo.
Gipasabot usab nga bisan anaa sa sulod sa pasilidad ang mga PDL, makatabang gihapon kini sa ilang mga pamilya pinaagi sa paggamit sa mga benepisyong ilang maangkon.
Dugang pa, daghan na sa mga PDL ang nakadawat sa ilang mga dokumento samtang ang uban padayon pang giproseso ang ilang mga rekord aron makuha ang ilang Member Data Record o MDR ug PhilHealth identification cards sa umaabot nga pagbalik sa mga ahensya.
Kauban usab sa kalihukan ang pagpahigayon og medical check-up alang sa mga benepisyaryo. Gipasabot usab sa BJMP nga kon adunay PDL nga magkasakit samtang anaa sa ilang kustodiya, awtomatiko kining dad-on ngadto sa government hospital alang sa hustong pagtambal.
Apan kon dili matambalan sa maong pasilidad ug adunay kapasidad sa pagbayad ang preso o iyang pamilya, mahimo silang mobalhin sa pribadong ospital apan sila ang moabaga sa tanang gastohan.Padayon ang Montevista District Jail sa pakigtambayayong sa nagkalain-laing ahensya aron mapalambo ang serbisyo ug masiguro ang kaayohan sa mga Persons Deprived of Liberty ubos sa ilang pagdumala.
