Gipalig-on sa Department of Labor and Employment (DOLE) ang kampanya batok sa mga employer nga mapakyas sa pagtuman sa minimum wage ug paghatag sa tukmang benepisyo sa ilang mga trabahante pinaagi sa padayon ug regular nga labor inspections.
Matod ni Rommil M. Cagas, Supervising Labor and Employment Officer sa DOLE, kanunay nga nagpahigayon ang ahensya og inspeksyon aron masiguro ug mamonitor ang pagsunod sa mga employer sa mga balaod sa pagpanarbaho ug sa mga mando nga nagpanalipod sa katungod sa mga empleyado.
Gipatin-aw ni Cagas nga gawas sa regular inspections, adunay gihapon gitawag nga “complaint inspection” diin mahimong modangop diretso sa DOLE ang mga trabahante kon adunay mga reklamo batok sa ilang employer.
Dugang niya, ang maong pamaagi nagtugot sa mga empleyado nga mapadayag ang ilang mga reklamo ug makatabang sa DOLE sa pag-ila sa mga establisemento nga posibleng naglapas sa labor standards.
Nag-awhag usab ang DOLE sa mga trabahante nga dili mahadlok sa pagpahibalo sa ahensya kon adunay paglapas sa minimum wage, kakulang sa benepisyo, o ubang kalapasan sa labor laws aron masiguro ang hustisya ug proteksyon sa ilang katungod sa trabahoan.
