Alerto 24 oras ang Civil Security Unit (CSU) sa LGU-Iligan sa pagpanalipod ug pag-atiman sa tanang kabtangan sa gobyerno sa syudad.
Gipasabot ni Head Security Management Division Marlon A. Clapano nga bisan unsang report kabahin sa pagpangdaot, pagtamastamas, pagpangawat, o pagbinuang sa mga government properties, dinaliang tubagon sa ilang grupo aron malikayan ang dugang kadaot ug masiguro ang hustong aksyon.
Matod pa niya, bukas kanunay ang ilang linya sa komunikasyon aron makadirekta ang mga residente sa pagpahibalo sa mga insidente nga may kalabotan sa mga pasilidad ug kabtangan sa gobyerno.
Giduso usab sa CSU ang kooperasyon sa publiko pinaagi sa dayong pagreport sa mga kahina-hinalang kalihokan aron mapadayon ang kaluwasan ug pagpreserbar sa mga kabtangan nga nagsilbi sa katawhan sa Iligan.
