Nagmalipayon ang 65 ka mga benepisyaryo sa Purok 3, Barangay Gabi, Compostela, Davao de Oro human opisyal nang mapasigaan sa kuryente ang ilang mga panimalay pinaagi sa serbisyo sa NORDECO ubos sa Sitio Electrification Program (SEP), nga gilunsad kagahapong adlawa, Hunyo 10, 2026.
Gitambongan ang maong kalihukan sa mga opisyal sa lokal nga panggamhanan sa lungsod sa Compostela ug uban pang mga sakop sa komunidad.
Sa pakighinabi sa Juader Radyo Nabunturan News Team, gipahayag ni Board of Directors Augusto S. Blanco Jr., sa NORDECO, nga tumong sa Sitio Electrification Program ang paghatag og kuryente ngadto sa mga hilit ug lisod maabot nga mga lugar aron matagamtaman usab sa mga lumolupyo ang benepisyo sa elektripikasyon.
Matod pa ni Blanco, kabahin ang Sitio Electrification Program SEP sa usa ka gatusan ka milyong pisong programa nga gipatuman sa Davao de Oro aron mapalapad ug mapalig-on ang serbisyo sa kuryente sa lalawigan.
Dugang pa niya nga pinaagi niini, mas daghang komunidad ilabina ang mga sitio nga wala pa maabti sa elektrisidad ang makadawat sa mga programa ug serbisyo sa gobyerno.-
Gilauman nga pinaagi sa maong proyekto, mas molambo ang panginabuhi sa mga residente ug mas mapadali ang ilang adlaw-adlaw nga mga kalihokan tungod sa pag-abot sa kuryente sa ilang komunidad.
