Gipaspasan sa Lokal nga Panggamhanan sa syudad sa Tagum ang pagpang-apod-apod og mga hard hats alang sa mga empleyado sa giingong syudad, isip dugang nga lakang sa pagpalig-on sa ilang kaluwasan ug pagpangandam batok sa mga emerhensya.
Sumala sa City Disaster Risk Reduction and Management Office (CDRRMO), ang maong protective equipment nakatakda unta nga ipanghatag sa sunod bulan isip kabahin sa pagsaulog sa National Disaster Resilience Month.
Apan tungod sa sunod-sunod nga mga pagtay-og sa yuta nga nasinati kagahapong adlawa Hunyo 8, 2026, sa pipila ka bahin sa rehiyon, nakadesisyon ang lokal nga panggamhanan nga mas sayohon ang paghatag niini aron masiguro ang ka-andam sa mga empleyado.
Gipasiugda sa CDRRMO nga ang hard hats usa sa mga importante nga butang nga makahatag og proteksyon ilabi na sa panahon sa linog ug uban pang kalamidad nga mahimong makapahinabo og pagkahugno sa mga butang o estruktura.
Kabahin kini sa padayon nga programa sa maong siyudad alang sa disaster preparedness ug resiliency, nga nagtumong sa pagpanalipod sa kinabuhi ug kahimsog sa mga empleyado samtang nagserbisyo sa publiko.
Samtang nagpadayon ang pagmonitor sa mga otoridad, alang sa kahimtang sa dakbayan ug mga posible nga hulga sa kalamidad, gihangyo usab ang tanang empleyado ug mga residente nga magpabiling alerto, andam, ug mosunod sa mga safety protocols aron malikayan ang kadaot panahon sa emerhensya.
Photo Courtesy: City Government of Tagum
